ڕاپۆرتی ڕێکخراوی ژنانی کوردستان بە بۆنەی ڕاگەیاندنی فەرمی ئینستیتوی کوردیی لۆزان

4 . جۆزەردان . 2726

ڕاپۆرتی ڕێکخراوی ژنانی کوردستان

بە بۆنەی ڕاگەیاندنی فەرمی ئینستیتوی کوردیی لۆزان

‏(Enstîtuya Kurdî ya Lozanê)

لۆزان – سویس

٤ی مای ٢٠٢٥

لە چوارچێوەی هەوڵ و تێکۆشانی نەتەوەیی و کولتووریی دیاسپۆرای کوردی لە ئەورووپا، ڕۆژی ٤ی مای ٢٠٢٥، لە شاری لۆزان، ڕاگەیاندنی فەرمی ئەنستیتۆی کوردیی لۆزان بە بەشداریی ژمارەیەک لە ڕۆشنبیران، ئەکادیمیستەکان، چالاکوان و نوێنەرانی دامەزراوە مەدەنییەکان بەڕێوە چوو. ئەم ڕووداوە بە هەنگاوێکی گرینگ بۆ پاراستن و پەرەپێدانی زمان، کولتوور و ناسنامەی کوردی لە تاراوگە دادەنرێت.

ڕێکخراوی ژنانی کوردستان وەک رێکخراوەیەکی چالاک و کاریگەر، بە شێوەیەکی بەرپرسانە و دڵسۆزانە بەشداریی کارا و دیاری هەبوو لە ئامادەکاری و بەڕێوەبردنی ئەم ڕووداوە مێژووییەدا.

ئەندامانی ڕێکخراوەکەمان چەندین ئەرکی گرنگیان لە ئەستۆ گرت، لەوانە:

• پێشوازیکردن و ڕێنوێنیکردنی میوانان و بەشداربووان؛

• وەرگێڕانی ڕاستەوخۆ لە زمانی کوردی بۆ فەڕانسەوی و بە پێچەوانەوە، بە مەبەستی گەیاندنی پەیام و ئامانجەکانی ئەنستیتۆ بە مێدیاکان و ئامادەبووان؛

• ئامادەکردنی خواردن و بەڕێوەبردنی بەشی میوانداری و پەزیرایی بە ڕەنگدانەوەی داب و نەریت و کولتوور و میوانداریی کوردی، کە فەزایەکی دۆستانە و گەرمی بە کۆنفرانسەکە بەخشی.

هەروەها جێگەی شانازییە کە لە پێکهاتەی دەستەی بەڕێوەبەری ئەنستیتۆی نوێدا، ژنان ڕۆڵ و دەورێکی بەرچاویان هەیە. لەوانە: بەڕێز نازیلێ ئەفخەمی وەک جێگری سەرۆک؛ بەڕێز نارا سەعدی وەک ئەندامی دەستەی بەڕێوەبەری کە شان بەشانی بەڕێزان نەجات زانیار وەک سەرۆک، عەزیز عەبدولکەریم و شەیموس ئۆزدەمیر کار دەکەن.

ڕێکخراوی ژنانی کوردستان دووپاتی دەکاتەوە کە بەردەوام دەبێت لە پشتگیری و هاوکاریی هەر پڕۆژەیەکی زانستی، کولتووری و نەتەوەیی کە خزمەت بە دۆزی ڕەوای گەلی کورد و پاراستنی ناسنامە و میراتی کوردی بکات بە تایبەت لە تاراوگەدا. ئێمە باوەڕمان وایە ئەم ئەنستیتۆ دەبێتە سەکۆیەکی گرنگ بۆ بەرزکردنەوەی دەنگی کورد، پەرەپێدانی توێژینەوە و داکۆکیکردن لە مافە ڕەواکانی نەتەوەکەمان.

ڕێکخراوی ژنانی کوردستان

4ی مای ٢٠٢٥